Зөвлөгөө 2. Персинг арчилгаа

Шинэхэн персингийг хэрхэн арчлах вэ?

1. Бохир гараар ээмгэнд хүрч хэзээ ч болохгүй. Зайлшгүй бактери устгагчтай савангаар гараа угаасны дараа персингний арчилгаа, цэвэрлэгээг зориулалтын ариутгагч уусмалаар хийнэ.

2. Персинг цэвэрлэх зааварчилгаа: Өдөрт дээд тал нь 2 удаа цэвэрлээрэй. Үгүй бол “хэт-цэвэрлэгээ” болж арьс хуурайшиж хатангиширна. Персинг эдгэх явцдаа шар цагаан өнгийн шингэн их бага хэмжээгээр ялгаруулж магадгуй тул ээмгийг тойрон хатаж тогтсон зүйлийг уусмалаа шингээсэн хөвөн тавьж 5-10 минут орчим халуун бүлээн жин тавин дэвтээнэ. Гүйцэт дэвтсэн бол чих ухдаг хөвөнгөөр хаттал нь эргэн тойрныг нь арчиж цэвэрлээрэй.

3. Шүршүүрт орохыг хориглох хэрэггүй. Гэхдээ биеийн саван болон шампунийг персинг дээр удааж болохгүй мөн бүрэн эдгэтэл нь баннд хэвтэж болохгүй. Олон нийтийн усан бассейнд ч тэр орохгүй байхыг зөвлөе.

4. Тэвчээртэй байгаарай! Гаднаасаа эдгэсэн мэт харагдах боловч дотроо бүрэн эдгээгүй байдаг учир дор хаяж 1 сарын турш тууштай цэвэрлэгээ хийнэ үү.

5. Шинэхэн цоолсон персингийг эхний 24 цаг оролдож болохгүй. Цус гарч, хавдаж хөхөрвөл санаа зовинох хэрэггүй, хэвийн үзэгдэл. Түүнчлэн цагаан хэрэглэл, хувцаснаас бохир ордог учир ариун цэвэр сахих хэрэгтэйг анхаарна уу.

6. Сайн амарч , стрессгүй тайван байх нь эдгэрэлтийн явцыг түргэсгэдэг учир таатай нөхцөлд байхыг зөвлөе.